في يوم من الايام وانت قاعد بتتفرج علي فيلم thor للمرة الخمسومية علي التوالي تفتكر ان (ثور) اصلا هو اله الرعد والخصب عند الاغريق وان الاغريق عندهم اساطير كتيرة جدا بتتشارك كلها نفس الموضوع الاساسي ألا وهو الالهة فتبدأ انك تفكر طب ايه اللي خلا حاجة زي الاساطير تظهر؟ وتنتشر وتتعمم قصصها بالطريقة ديه؟ واحنا هنا هنجاوبلك عن سؤالك دة.
سنة 1991 نشر الكاتب جوستاين غاردر كتابه الشهير بعنوان "عالم صوفي" واللي اتكلم فيه عن نشأة الاساطير وخصوصا في الشمال زي الاغريق والنرويج وقال فيه ان الاساطير اتعرفت قبل ظهور المسيحية متخذة علي عاتقها تفسير الظواهر الطبيعية اللي العلم ماكانش قادر يفسرهالهم في الوقت دة. نرجع تاني لصاحبنا (ثور) ومطرقته فكان بيعتقد اهل النرويج قديما ان (ثور) كل ما كان بيضرب بمطرقته السما العواصف والصواعق تشتغل وبما ان العواصف والصواعق بتصاحب المطر فكان (ثور) بيُعبد كإله للخصب برضو لكن دة مش السبب الوحيد اللي خلا (ثور) من اهم الالهة عند الفايكنز كان فيه سبب تاني وهو ان الفايكنز كانوا بيعتبروا العالم كله عبارة عن جزيرة كبيرة وفي نص الجزيرة مكان اسمه (اسغارد) واللي هو مقر الالهة وفي الاطراف بيسكن الجبابرة الاشرار وقامت اساطير كتيرة اوي في اطار القصة ديه اشهرها اسطورة وصلتلنا عن طريق قصيدة ( تريمسكفيدا ) والاسطورة بتحكي بإختصار عن (ثور) اللي صحي من النوم وملقاش مطرقته فبيروح لارض الجبابرة وساعتها بيقابل ملك الجبابرة (تريم) اللي بيقوله انه دفنها علي عمق 800 متر تحت الارض وانه مش هيرجعها غير لما يخليه يتجوز (فريا) واللي بالمناسبة كانت إلاهة الخصب فساعتها الالهة بقوا في مأساه لإن من غير فريا النبات مش هيطلع والستات مش هتحمل وهتجف المحاصيل بس (فريا) مابترضاش لما (لوكي) اللي هو صاحب (ثور) يطلب منها تتزين عشان هتتجوز وهنا جه الاله (همدال) وقال فكرة وهي ان (ثور) يتنكر في علي هيئة بنت ويروح هناك علي انه (فريا) وفعلا عملو كدة واثناء الفرح (تريم) امر اتباعه انهم يجيبوا المطرقة عشان يحطوها تحت رجلين العروسة بس بمجرد ما اتحطت المطرقة تحت رجلين (ثور) راح (ثور) ماسكها وقتل (تريم) وبعد كدة قتل كل اسرة الجبابرة وتوتة توتة خلصت الحدوتة.
هي ديه الاسطورة بإختصار شديد بس الاساطير اللي زي ديه مش معمولة للتسلية بس. فلما كان بيصيب البلاد حالة من الجفاف الناس كانت بتحس بحاجتهم لفهم سبب انحباس المطر فهل ممكن يكون دة بسبب ان الجبابرة اخدت مطرقة (ثور) ؟ وتبدأ الاسطورة تفسر تغير الفصول: في الشتا الارض ميتة عشان مطرقة (ثور) في ارض الجبابرة بس هو هيرجعها في الربيع. وبالطريقة ديه بتحاول الاساطير انها تجاوب علي اللي الانسان مش قادر يفهمه بس الاساطير ماكنش بيقف دورها عند التفسير بس. حيث كان الناس بتقوم بطقوس دينية لها علاقة بالاسطورة زي انهم يلبسوا واحد لبس عروسة عشان مطرقة (ثور) ترجع حيث انهم كانوا بيحسوا ان بفعلهم دة فهما بيساعدوا المطر انه ينزل.
ولو انت سألت نفسك ليه اخترع الفايكنز آلهة وكل واحد متميز بصفة زي الحكمة والحب واخترعوا جبابرة زيهم بيتميزوا بالانانية والشر وكأنه تجسيد لعالم البشر فأحب اقولك انك فكرت زي ما فكر الفيلسوف (كزينوفان) الي عاصر سنة 570 قبل الميلاد وقال :'' لقد خلق الناس الالهة علي صورتهم وهم يعتقدون ان الالهة ولدت بجسد يرتدي ملابس وتتكلم مثلنا ، الاثيوبيون يعتقدون ان آلهتهم ذات انف افطس ولون اسمر بينما يعتقد التراكر(THRKER) ان الهتهم زرقاء العين حمراء الشعر ولو ان الثيران والخيول والاسود عرفت ان ترسم لرسمت الالهة علي شكل عجل او حصان او اسد''
اظن دلوقتي عرفت ليه الإنسان اخترع الاساطير
لو حابب اتكلم عن موضوع معين قولي في الكومنتات
